Газ жарылып, бір үйдің алты адамы ажал құшты

Өзбекстанның Самарқанд қаласындағы Спитамен көшесінде орналасқан тұрғын үйде тұрмыстық газ қоспасының жарылуы салдарынан күшті жарылыс болды. Құлаған үйінділер астынан алты адамның мәйіті табылды, деп хабарлайды POLITICO.KZ.

Оқиға орнына келген құтқарушылар төтенше жағдайдың салдарын жоюға дереу кіріскен. Құтқару және үйінділерді тазалау жұмыстары түні бойы жүргізілді.

Жарылыс салдарынан өрт шықпағанымен, ғимараттың темірбетон құрылымдары қираған. Нақтырақ айтқанда, ғимараттың жертөле қабаты мен алғашқы үш қабаты айтарлықтай бүлінген.

Қазіргі уақытта оқиға орнында Самарқанд облыстық ТЖМ басқармасының басшысы жетекшілік ететін жедел штаб жұмыс істеуде. Штаб құрамына прокуратура, ІІМ, Денсаулық сақтау министрлігі, Hududgazta'minot және басқа да тиісті құрылымдардың өкілдері кірді. Жарылыс салдарын жоюға 10 дана өрт-құтқару техникасы мен арнайы қызметтер жұмылдырылған.

Аталған факті бойынша алдын ала тергеу басталды. Қазір жарылыстың себептері мен мән-жайлары анықталуда.