Жетісу облысында 11 жылқыны пойыз басып кетті

Жетісу облысында жүк пойызы 11 жылқыны басып өтті, деп хабарлады politico.kz Polisia.kz-ке сілтеме жасап.

Жалпы, биыл 8 айда көліктегі полиция департаментінде пойыздардың шұғыл тежелуінің 1 417 дерегі тіркелген. Еліміздің темір жолдарында 1 070 жануарды қағып кету фактілері болды. Оның ішінде 355 жылқы, 191 ірі қара, 28 ұсақ мал және т.б. Бұл туралы көліктегі полиция департаментінің бастығы Бақытжан Малыбаев мәлім етті.

Оның айтуынша, 31 тамызда Жетісу облысының Быжы-Бахша аралығында жүк пойызының машинисі темір жолда үй жануарларының болуына байланысты шұғыл тежеу қолданған. Алайда соқтығысудың алдын алу мүмкін болмады. Салдарынан 8 жылқы пойыз астына түсті. Жоспарланбаған пойыз тұрағы 14 минутты қамтыды.

Дәл сол күні Сарыөзек-Үштөбе аралығында да осындай факті анықталды. Онда жүк пойызы 3 жылқыны қағып кетті, – делінген ақпаратта.

Үштөбе станциясындағы желілік полиция бөлімінің қызметкерлері тексеру барысында үй жануарларының иелерін тауып, оларды теміржолдың бөлінген жолағында мал жаю ережелерін бұзғаны үшін әкімшілік жауапкершілікке тартты. Олар Жетісу облысының 44 және 55 жастағы тұрғындары болып шықты.

Малыбаев көлік полицейлері үнемі рейдтер жүргізіп, мал иелерімен әңгімелер өткізіп, жадынамалар таратып, ауыл шаруашылығы жануарларының иелерін мұқият болуға шақыратынын айтты. Ұдайы жүргізілетін профилактикалық жұмыстарға қарамастан, тұрғындар тарапынан құқықбұзушылықтарға әлі де жол беріліп отыр.

Теміржол арқылы өту өткелдерінде, жол өтпелерінде және арнайы белгіленген орындарда ғана рұқсат етілгенін тағы да еске саламыз. Дегенмен қараңғы, тұманды, нөсер жаңбыр және боранды күндері, тіпті, ол жерлерден де өтуге тыйым салынады, – деді Бақытжан Малыбаев.

Фото: dzen.ru