Жаңбыр, найзағай, жел: 3 маусымда күн құбылмалы болады

Қазақстан аумағының басым бөлігінде атмосфералық фронттардың әсерінен құбылмалы ауа райы сақталады.

Найзағай ойнап, жаңбыр жауады, елдің шығысында қатты жаңбыр жауады, күндіз бұршақ болады.

Алайда елдің солтүстік және орталық аймақтарына жауын-шашынсыз ауа райын әкелетін антициклон әсер етеді.

Республика бойынша жел күшейеді, шығыста түнгі және таңертеңгі уақытта тұман түседі.

Түркістанның тау бөктеріндегі аудандарында, Батыс Қазақстан, Қызылорда, Маңғыстау, Атырау, Жамбыл, Қостанай, Ақтөбе, Қарағанды және Ұлытау облыстарында өрт қаупі жоғары.

Түркістан облысының шөлді аудандарында, Атыраудың солтүстік-батысында, Қызылорда облысының шығысы мен батысында, Батыс Қазақстан және Шығыс Қазақстан облыстарының оңтүстігінде төтенше өрт қаупі сақталады.