«Ақ Toyota-ны тап»: ЖИ Алматы облысының полициясына қалай көмектесуде

Алматы облысында «Сергек» зияткерлік қоғамдық және жол қауіпсіздігі жүйесінің бір жылдық жұмысы қорытындыланды, деп хабарлайды Politico.kz.

Өңірде цифрлық жүйе өткен жылдың қыркүйек айында іске қосылып, облыстың 13 ауданын қамтыды. Бүгінде 325 аппараттық-бағдарламалық кешен мен 9 мыңнан астам бейнекамера орнатылған. Сондай-ақ әр ауданда жергілікті шағын Жедел басқару орталықтары (ЖБО) жұмыс істейді, ал патрульдік көліктер қозғалыс кезінде тәртіп бұзушылықты тіркейтін 10 жылжымалы Sergek Patrol Box кешенімен жабдықталған.

Жаңа жүйе қарапайым бейнебақылаудан жасанды интеллект негізіндегі терең деректер талдауына өтуге мүмкіндік берді.

— Алматы облысында бейнедеректермен жұмысты түбегейлі өзгерткен AI платформасын енгіздік. Операторға «ақ Toyota-ны тап» сияқты дауыстық команда беру жеткілікті, ал алгоритмдер бейнеархивті өздері талдап, қажетті көлікті тауып береді. Ақылды бейнесараптама, жылжымалы кешендер мен стационарлық камераларды біріктіре отырып, біз полицияға қауіпті жүргізушілерді автоматты түрде анықтауға және кез келген оқиғаға бірнеше минут ішінде әрекет етуге көмектесеміз, — деді Sergek Group басшысы Евгений Ким.

Алматы облыстық Полиция департаменті ақпараттық саясат бөлімінің басшысы Ернар Сайділдиннің айтуынша, жасанды интеллектті қолдану жол қауіпсіздігін едәуір жақсартты. Жүйе енгізілгелі жол-көлік оқиғаларынан зардап шеккендер саны 31,8%-ға, ал қаза тапқандар 47,6%-ға азайған. «Qorgau» қосымшасымен бірлескен жұмыс нәтижесінде 94 мыңнан астам тәртіп бұзушы тоқтатылды.