"Атыраулық хакерге" халықаралық іздеу жарияланды

Атырау облысында жоғалған отбасының ісіне байланысты әлеуметтік желіде түрлі нұсқаларды таратқан, өзін “Атыраулық хакер” деп таныстырған азаматқа халықаралық іздеу жарияланды. Бұл ақпаратты өңірлік полиция департаментінің баспасөз қызметі растады, деп хабарлайды Politico.kz.

Әлеуметтік желілерде белсенді болған ер адам халықаралық іздеуде жүргенін өзі де жариялаған. Атырау облыстық полиция департаменті бұл деректі ресми түрде растады.

Құқық қорғау органдарының мәліметінше, аталған азаматқа алаяқтық фактілері бойынша іздеу жарияланған. Бұл іс Атырау облысында із-түзсіз жоғалған отбасыға қатысты қылмыстық іске ешқандай қатысы жоқ.

Алдын ала ақпарат бойынша, күдікті қазіргі уақытта Қазақстан аумағынан тыс жерде бой тасалап жүр. Тергеу және іздестіру шаралары заң аясында жалғасып жатыр.