Болжам: Қазақстанда тұрғын үйді жалға алу және сатып алу қымбаттауы мүмкін

Бұл туралы Жылжымайтын мүлік федерациясының басшысы Ермек Мүсіреповке сілтеме жасап, lsm.kz жазды.

Ермек Мүсіреповтің айтуынша, ҚҚС ставкасының 20%-ға дейін өсуі шағын құрылыс компанияларының жабылуына әкеледі. Өйткені құрылыс материалдары мен үй салу, сылақ жасау жұмыстарының құны да өседі.

Сондай-ақ ол элиталық және бизнес-кластағы үйлер 10%-ға, комфорт пен эконом кластағы үйлер 5-10%-ға қымбаттауы мүмкін деген болжам айтты.

«Тұрғын үй құнының өсуі халықтың табысы орташа немесе төмен бөлігінің үй алу мүмкіндігін төмендетеді. Сондай-ақ бұл эконом класқа деген сұранысқа әсер етеді. Сондықтан халық жалға алуға көше бастайды. Сәйкесінше, жалға алу тарифтері де 10%-ға артуы мүмкін», - деді Ермек Мүсірепов.

Сонымен қатар, өңірлерде жұмыс істейтін шағын құрылыс компаниялары банкрот болуы мүмкін. Себебі нарықта бәсекелестік күшейеді.