Дала Қырандары есірткі тасушыны қолға түсірді

Теміртау қаласында қоғамдық тәртіпті бақылауға шыққан Дала Қырандары қозғалысының белсенділері есірткі жасырумен айналысқан күдіктіні құрықтады, деп хабарлайды Politico.kz.

Оқиға кезекші топтың қала ішіндегі кезекті азаматтық бақылау рейді барысында орын алған. Куәгерлердің сөзіне сүйенсек, тұрғын үй аулаларының бірінде белгісіз ер адамның оғаш қылығы мен күмәнді әрекеттері белсенділердің назарын аударған. Жіті бақылаудың нәтижесінде оның тыйым салынған заттарды жасырын орындарға қалдыруға, яғни ізін жасыруға тырысқаны белгілі болды.

Қырандар бұл жағдайда шұғыл шешім қабылдап, қаскөйдің арам ойын жүзеге асыруына жол бермеген. Олар күдіктіні қылмыс үстінде әшкерелеп, құқық қорғау органдарының қызметкерлері келіп жеткенше оқиға орнынан тапжылтпай ұстап тұрған. Нәтижесінде, ұсталған азамат тергеу амалдарын жүргізу үшін полиция жасағына табысталды.