Мемлекет басшысы: «Біздің ұрпақ міндетті түрде үлкен жетістікке куә болып, табысқа жетуі керек»

Бүгін, 29 тамызда Конституцияның 30 жылдығына арналған ғылыми-практикалық конференцияда сөз сөйлеген Президент Қасым-Жомарт Тоқаев маңызды жаңалықты жария етті, деп хабарлайды POLITICO.KZ.

Мемлекет басшысы өзінің халыққа арналған кезекті Жолдауын 8 қыркүйекте жариялайтынын мәлімдеді. 

Президент өз сөзінде қазіргі буынның тарихи жауапкершілігіне ерекше тоқталды. Ол барша қазақстандықтардың тарихқа «қазақтың қайта жаңғыру дәуірінің өкілі» ретінде енуі тиіс екенін атап өтті.

«Біз бәріміз төл тарихымызға қазақтың қайта жаңғыру дәуірінің өкілі ретінде енуге тиіспіз. Себебі бәріміз бір дәуірде өмір сүреміз, еліміздің болашағына бірге жауаптымыз. 

Біздің ұрпақ міндетті түрде үлкен жетістікке куә болып, табысқа жетуі керек. Балаларымыз бен немерелерімізге дамыған, өркениетті, құқықтық ел қалдыруымыз қажет. Бұл – біздің тарихи борышымыз. Осы мақсатқа жету үшін біз қазір Әділетті, Таза, Қауіпсіз әрі Қуатты Қазақстанды құрып жатырмыз. Түптеп келгенде, бұл – ұлттық идеология. 

Біздің басты міндетіміз – озық ойлы, бәсекеге қабілетті ұлт болу, халықтың әл-ауқатын арттыру, елдегі тұрақтылықты сақтап, қоғамдық келісімді қамтамасыз ету. Сондықтан қазақ елінің қастерлі төлқұжаты – Конституциямыздың әр бабы мүлтіксіз орындалады. Бұл – баршаға ортақ міндет. 

Бәріңізге мәлім, мен 8 қыркүйекте халыққа Жолдауымды жариялаймын. Еліміздің экономикалық және әлеуметтік саясатындағы маңызды мақсат-міндеттерді айқындаймын», – деді Президент.

Мемлекет басшысы сөзін баршаға амандық пен табыс тілеп, «Конституциямыздың айбыны асқақ болсын!» деген сөздермен аяқтады.