«Мықты бол... Күрес...»: Сәрсемалиевтің анасы сотта ұлына үн қатты

Жангелдин ауылындағы отбасы өліміне қатысты сот отырысында айыпталушы Сұлтан Сәрсемалиевтің анасы Гүлнар Азмұханова сөз сөйледі, деп хабарлайды Politico.kz.

Ол соттың сұрақтарына жауап беруден бас тартқандықтан, тергеу барысында берген көрсетулері оқылды. Әйел өз жауабын толықтай растайтынын мәлімдеді.

Сот залынан шығар алдында Гүлнар Азмұханова судьядан ұлына тіл қатуға рұқсат сұрады. Анасы Сұлтанға бес баласының бар екенін еске салып, қандай жағдай болса да олардың әкесі болып қала беретінін айтты.

«Сен бұл өмірде қуаныш көрмедің. Өмір бойы күресіп келдің. Мықты бол. Өмір үшін күрес. Мен балаларыңа олардың әкесі бар екенін айтып отырамын», – деді ол.

Айта кетейік, Жангелдин ауылындағы жаппай кісі өлтіру ісі бойынша сот процесі жалғасып жатыр. Тергеу нұсқасы бойынша, қаза тапқандар айыпталушының бұрынғы әйелінің туыстары болған.