Павлодарда пара беруге итермелеген бұрынғы полиция қызметкеріне үкім шықты

Павлодар қаласының соты клиентін алдап, пара беруге итермелеген бұрынғы полиция қызметкеріне қатысты үкім шығарды, деп хабарлайды Politico.kz.

«Сот кабинетінің» дерегіне сүйенсек, 48 жастағы адвокат Әлем Битенов өзінің қорғауындағы азаматтан 6,1 миллион мың теңге көлемінде ақша жымқырып, 3 жыл 3 айға бас бостандығынан айырылды.

Былтыр қаңтар айында алаяқтық жасады деген күдікке ілінген Сүлейменов М. есімді азамат өзін қорғау үшін Әлем Битеновті жалдап, оған 1 миллион теңге қаламақы төлеген. Алайда Битенов клиентінің қамауға алынудан қорқатынын пайдаланып, құқық қорғау органдарының қызметкерлеріне пара беру керек деген желеумен ақша жымқыру жоспарын құрған. Ол жәбірленушіні үнемі алдап, қаражатты өзінің есепшотына аудартып отырған.

Алдымен адвокат жәбірленушінің әйелін изоляторға қамалмас үшін полиция бөлімі бастығының орынбасары Салатовқа 2 миллион теңге беру керек деп көндірген. Кейін ол тергеуші Құсайыновқа 100 мың теңге және жауапкершіліктен құтылу үшін прокурордың орынбасары Қаткеновке 2 миллион теңге қажет екенін айтқан. Бұл қаражатты тауып беру үшін отбасы өздерінің алтын бұйымдарын ломбардқа өткізуге мәжбүр болған. Наурыз айында заңгер тергеу мерзімін ұзарту үшін тағы 2 миллион теңге талап етіп, өзінің жеке қажеттіліктеріне қосымша 1 миллион теңге қарыз алған. Тергеу барысында аталған лауазымды тұлғалардың ешқайсысы пара сұрамағаны және алмағаны анықталды.

Сәуір айында алданғанын түсінген Сүлейменов адвокатын ауыстырып, сыбайлас жемқорлыққа қарсы қызметке жүгінген. Ер адам жасырын аудиожазба жасайтын арнайы құрылғы алып, Битеновпен бірнеше рет кездесу өткізген.

Мамыр айында ұсталар алдында ол өзінің қылмысы ашылғанын сезіп, жымқырылған барлық қаржыны және бастапқы қаламақысын жәбірленуші тарапқа толық қайтарып берген.

Сотта Әлем Битенов өз кінәсін толық мойындап, жасаған ісіне өкінетінін жеткізді. Сот оның кәмелетке толмаған балаларының бар екенін, бұрын істі болмағанын, жұмыс орнынан жақсы мінездеме берілгенін және шығынды өз еркімен толық өтегенін ескерді.

Биыл 27 ақпанда сот оған орташа қауіпсіздік мекемесінде жазасын өтеуді бұйырып, бас бостандығынан айыру жазасын тағайындады. Битенов сот залында қамауға алынып, өмір бойы мемлекеттік қызметте жұмыс істеу құқығынан, полиция подполковнигі шенінен және 3 жылға адвокаттық қызметпен айналысу құқығынан айырылды.