«Qarmet» комбинаты 80 жылдан кейін алғаш рет газға көшті

Теміртаудағы «Qarmet» комбинаты алғаш рет табиғи газбен жұмыс істей бастады, деп хабарлайды POLITICO.KZ.

Теміртау қаласындағы металлургиялық алып – «Qarmet» комбинаты өз өндірісінде алғаш рет табиғи газ қолдануға көшті. Бұл қуанышты жаңалықты кәсіпорын жұмысшылары түсірген бейнежазба арқылы бөлісті.

"Газ жүрді, бауырлар! Соңғы 80 жылда бірінші рет. Аталарымыз, әкелеріміз күтті – күте алмады. Ал біз – күттік, біздің кезеңімізде жетті. Кұтты болсын!. Мен таң қалудамын, тек сіздермен бөліскім келді" - дейді комбинат жұмысшысы.

Комбинат бұған дейін сегіз онжылдық бойы табиғи газсыз, ескі әдіспен болат өндіретін әлемдегі жалғыз толық циклді кәсіпорын болып келген еді. Бұл өзгеріс дайын өнім сапасына да, Теміртаудың экологиялық ахуалына да айтарлықтай ықпал етеді.