Ядролық сынақтарға қарсы күн: Тоқаев әлемді бейбітшілікке шақырды

Мемлекет басшысы бейбітшілікке үндеп, әлемге үн қатты, деп хабарлайды POLITICO.KZ.

Бүгін, 29 тамыз – Ядролық сынақтарға қарсы халықаралық іс-қимыл күніне орай Мемлекет басшысы Қасым-Жомарт Тоқаев өзінің X әлеуметтік желісіндегі парақшасында үндеу жариялады. Президент өз сөзінде бейбітшілікті нығайтып, ядролық қарудан толық бас тартуға шақырды.

«Бүгін – Ядролық сынақтарға қарсы халықаралық іс-қимыл күні. Бұл атаулы күнді БҰҰ Бас Ассамблеясы Қазақстанның  бастамасымен бекітті. Халқымыз атом қаруын сынаудан қатты зардап шекті. Мұндай қасірет қайталанбауға тиіс. Біз кейінгі ұрпақтың жарқын болашағы үшін бейбітшілікті нығайтып, халықаралық әріптестікті дамыта түсуіміз керек. Ядролық қарудан және сынақтардан біржола бас тартуға күш салуымыз қажет. Бейбітшілік пен қауіпсіздік – бүкіл адамзатқа ортақ ең басты құндылықтар», – деп жазды Президент.

Бұл атаулы күннің Қазақстан үшін тарихи маңызы зор. Дәл осы күні, 1991 жылдың 29 тамызында Нұрсұлтан Назарбаевтың жарлығымен әлемдегі ең ірі ядролық полигондардың бірі – Семей ядролық сынақ полигоны жабылған болатын. Кейіннен еліміздің ұсынысымен Біріккен Ұлттар Ұйымы бұл күнді халықаралық деңгейде атап өту туралы шешім қабылдады.