Сарапшы Қазақстанда ішкі араздықты кім қоздыруы мүмкін екенін айтты

Сарапшы Қазақстанда араздықты қоздыруға мүдделі тараптар туралы пікір білдірді, деп хабарлайды POLITICO.KZ

SHYNDYK TV подкастында ақпараттық қауіпсіздік жөніндегі сарапшы Эмин Джаббаров Қазақстанда ішкі араздықты қоздыруға кім мүдделі болуы мүмкін деген сұраққа жауап берді.

Сарапшының пікірінше, Қазақстанның барлық елдермен достық қарым-қатынаста болып, бейтараптық саясатын ұстанғанына қарамастан, сыртқы күштердің ықпал ету әрекеттері болуы мүмкін. Ол әсіресе соғыс жағдайындағы көршілес елдер Қазақстанды өздеріне тиімді ұстанымға итермелеу үшін психологиялық тәсілдер жүргізуі ықтимал екенін атап өтті.

Джаббаровдың айтуынша, мұндай әрекеттер көбінесе тіл немесе этносқа қатысты даулы жағдайларды өршіту арқылы көрініс табады. Ол мұндай оқиғалардың әлеуметтік желілерде жылдам таратылатынын, бұл ішкі қақтығыстарды тудыруға мүдделі тараптардың бар екенін айтты.

«Бұл тақырыптың әлеуметтік желіде мақсатты түрде таратылып жатқаны күмән тудырмайды. Мұның астарында тілдік және этностық алауыздықты қоздыру арқылы өз мүддесіне жеткісі келетін күштер тұр», – дейді сарапшы.