«Сенерім де, сүйенерім де бір Алла»: Нұрғали Нүсіпжанов елді алаңдатқан жазба жариялады
Халық әртісі Нұрғали Нүсіпжанов денсаулығына байланысты оңалтудан өтіп жатқанын айтты, деп хабарлайды Politico.kz.
Қазақстанның халық әртісі Нұрғали Нүсіпжанов әлеуметтік желідегі парақшасында денсаулығына қатысты жазба жариялап, қазіргі уақытта оңалту емін қабылдап жатқанын мәлімдеді.
Өнер иесі өміріндегі әрбір күні үшін Аллаға шүкіршілік ететінін айтып, қиын кезеңде сенімінің де, сүйенерінің де бір Алла екенін жеткізді. Сондай-ақ ол адамның ең үлкен бақыты – амандық екенін атап өтті.
Әнші жариялаған жазбасында тағдырдың бәрі Жаратқанның қолында екенін айтып, қандай жағдайда да қанағат, тәубе және сабыр сақтау керектігін жеткізді.
Нұрғали Нүсіпжанов денсаулығына қатысты нақты диагнозы немесе емдеу барысы жөнінде қосымша мәлімет берген жоқ.
Желі қолданушылары өнер иесіне қолдау білдіріп, тезірек сауығып кетуіне тілектестік танытты. Пікір қалдырған оқырмандар оған зор денсаулық, ұзақ ғұмыр және шығармашылық табыс тілеп, жылы лебіздерін жаудырды.
Соңғы жаңалықтар
