"Шаруаларың болмасын, тыныштық беріңдер". Атырауда жоғалған отбасының ұлы не жазған?
Атырау облысы Жангелдин ауылында із-түзсіз жоғалған отбасы мүшелерімен туыстары тек WhatsApp мессенджері арқылы ғана байланыс орнатқанын айтады,деп хабарлайды Politico.kz.
Өз үйінен өлі күйінде табылған Мақсот Қарабалиннің қарындасы Әдемі Шылмағамбетова қайғылы жағдайға қатысты соңғы хат-хабарлар жайын баяндады. Оның айтуынша, қараша айының басында отбасының ұлы Наурыз әпкесіне отбасындағы жанжалдар туралы WhatsApp арқылы жазған. Алайда сол хабарламадан кейін туыстарымен байланыс үзіліп кеткен.
Алаңдаған қарындасы біраз уақыттан соң Наурызға өзі хабарласқан. Сол кезде отбасы мүшелерінің ішінде тек Наурыздың телефоны ғана қосулы болған.
«Уақ малдарын түгел сатып жіберіпті деген сөз шыққан соң, қайтадан Наурызға жаздым. “Не істеп жатырсыңдар? Қайда кеттіңдер?” деп сұрадым. Ол маған: “Апамды Ташкентке алып кеттік, емдетуге” деп жауап берді», – дейді Әдемі Шылмағамбетова.
Оның айтуынша, Наурыз нақты мекенжайды ашып айтпай, тек жазбаша жауап берумен шектелген.
«Қай жерде, қай ауруханада екенін сұрағанда, “ағайындардың, таныстың үйінде” деді. Телефонмен сөйлеспей, тек WhatsApp арқылы жазды. “Апам массаж алып жатыр, анализ тапсырып жатыр” деп қана қысқа жауап беретін», – дейді марқұмның қарындасы.
Әңгіме барысында ол Наурызға ауылдағы жағдайды да ескерткенін айтады.
«Еліңде малың, үйіңде газ жанып тұр. Тәтең мен Мейрамгүлді ауылға жібер, өзің анаңның қасында бол” дедім. “Қашан қайтасыңдар?” деп сұрағанда, “желтоқсанның 10-ында ауылға шығамыз” деді», – деп еске алады ол.
Соңғы жаңалықтар
