«Шаштары жылқының жалы сияқты»: Алматыда ресейлік блогердің сөзі дау тудырды
Әлеуметтік желіде Алматыда түсірілген ресейлік TikTok блогерінің видеосы қызу талқыланып жатыр, деп хабарлайды Politico.kz сайты NewTimes.kz-ке сілтемемен.
Қалада серуендеп жүрген блогер қазақстандық қыздардың сыртқы келбетіне қатысты пікір білдіріп, олардың ұзын шаштарын жылқының жалына ұқсатқан.
Блогердің бұл сөзі желі қолданушыларының арасында түрлі пікір тудырды. Кейбір адамдар оның сөзін орынсыз әрі қорлайтын пікір деп бағалап, блогерді жауапкершілікке тартуды ұсынды.
«Заң бойынша тауып, жазалау керек», «Өзің жылқысың», «Енді шашымыз да ұнамай қалды» деген секілді пікірлер жазылды.
Алайда блогерді жақтағандар да аз болмады. Олардың пікірінше, ол ешкімді әдейі ренжітуді көздемеген, тек ойын дұрыс жеткізе алмаған. Кейбір қолданушылар блогердің жылқының жалын мысал ету арқылы қазақ қыздарының ұзын әрі қалың шашын мақтағысы келгенін айтты.
Желі қолданушыларының бір бөлігі блогердің видеода Алматы мен оның тұрғындары туралы жалпы оң пікір айтқанын атап өтті. Ол қаланың ауа райын, жолдарын, адамдарын және инфрақұрылымын жоғары бағалаған.
Тағы бір қолданушы қазақ мәдениетінде жылқының ерекше орын алатынын ескеріп, жылқының жалына теңеуді міндетті түрде жағымсыз мағынада қабылдамау керек деген пікір білдірді.
Осылайша, блогердің бір ауыз сөзі әлеуметтік желіде екі түрлі пікір қалыптастырды. Бір тарап оны қорлау деп қабылдаса, екінші тарап блогердің жалпы видеода Алматы мен жергілікті тұрғындарға оң баға бергенін алға тартып, оның сөзін сәтсіз айтылған комплимент ретінде бағалады.
Соңғы жаңалықтар
