Таразда куәлігі жоқ жүргізуші қаққан әйел төсек тартып қалды

Таразда тротуармен жұмысқа бара жатқан әйелді Lexus көлігі қағып кеткен, деп хабарлайды Politico.kz КТК телеарнасына сілтемемен.

Ауыр жарақат алған 40 жастағы Ульяна Лагашкина 3 айға жуық ауруханада жатып, қазір төсек тартып қалған. Ал оны қаққан жүргізушінің көлік басқаруға құқығы болмаған. Соған қарамастан, кінәсін мойындаған әйел рақымшылыққа ілігуі мүмкін. Зардап шегушінің туыстары іс сотқа жетпей жабылып қала ма деп алаңдап отыр.

Оқиға жаздың ортасында Тараз қаласының орталығында болған. Маникюр шебері болып жұмыс істейтін Ульяна Лагашкина сол күні әдеттегідей жұмысына бара жатқан. Кенет тротуарға шығып кеткен Lexus оны қағып, әйел ауыр жарақат алған.

Соққыдан Ульяна бірден есінен танып қалған. Ол бір аптадан астам уақыт жансақтау бөлімінде, кейін тағы екі ай аурухананың жалпы бөлімшесінде жатқан.

Қазір 40 жастағы әйел өздігінен қозғала алмайды. Бұрын отбасын асырап келген Ульяна енді өзі өзгелердің көмегіне мұқтаж.

Оның күйеуі де мүгедектігі бар адам, ал балалары әлі оқып жүр. Отбасының негізгі табыс көзі Ульянаның еңбекақысы болған.

Белгілі болғандай, сол күні Lexus тізгінінде отырған әйелдің жүргізуші куәлігі болмаған. Ол күйеуінің көлігін айдап шығып, газ бен тежегішті шатастырып алған.

Жүргізуші өз кінәсін мойындағанымен, оқиғаның абайсызда болғанын айтқан.

«Мені тек аяғыма тұрғызсаңыз болды»

Зардап шеккен Ульянаның айтуынша, жүргізуші жол апатынан кейін одан кешірім сұраған.

«Ол не айтты дейсіз бе? Тек кешірім сұрады. Мен оған: "Мені тек аяғыма тұрғызыңыз. Басқа ештеңе сұрамаймын. Қайта жүріп кетсем, сол күні-ақ бәрін ұмытамын", дедім», – дейді Ульяна Лагашкина.

Алғашында жүргізуші зардап шеккен әйелге көмектескен. Арнайы медициналық төсек сатып алып беріп, бірнеше ем-дом шарасының ақысын төлеген.

Алайда Ульянаның туыстарының сөзінше, кейін ол хабарсыз кеткен.

Көп ұзамай отбасының адвокатына жүргізушіге рақымшылық қолданылуы мүмкін екені айтылған.

«Істі жауып тастағысы келген болуы мүмкін»

Зардап шеккен әйелдің адвокаты Лола Врублевская тергеудің қалай жүргізіліп жатқанына күмән келтіреді. Оның пікірінше, жүргізушіні рақымшылыққа іліктіру арқылы істі аяқтау әрекеті болуы мүмкін.

«Біз бұл істі жауып тастағысы келді ме, әлде кінәлі адамға рақымшылық жасауды көздеді ме деп күдіктенеміз. Бірақ бұл жағдайда рақымшылық қолданылмауы керек. Өйткені келтірілген зиянның санаты оған жатпайды. Жәбірленушінің денсаулығына ауыр зиян келген. Дегенмен ештеңеге таңғалмайтын болдым», – дейді адвокат Лола Врублевская.

Қорғаушының айтуынша, тергеу әуел бастан күмәнді жүргізілген.

Мәселен, Ульяна ұзақ уақыт бойы ресми түрде жәбірленуші деп танылмаған. Оның алғашқы жауабы жол апатынан төрт ай өткен соң ғана алынған.

Адвокаттың сөзінше, тергеушілер оқиға орнындағы бейнежазбаны да алмаған.

Алайда полиция бұл айыптауларды әзірге не растаған, не жоққа шығарған жоқ.

Полиция не дейді?

Жамбыл облыстық полиция департаментінің баспасөз қызметінің жетекшісі Гүлсара Мұхтарқұлованың айтуынша, жол апатына қатысты қылмыстық іс қозғалған.

«Аталған дерек бойынша Қазақстан Республикасы Қылмыстық кодексінің 345-бабының 2-бөлігімен сотқа дейінгі тергеу басталды. Көлік арнайы айыптұраққа қойылды. Қазір қажетті тергеу амалдары жүргізіліп жатыр», – деді Гүлсара Мұхтарқұлова.

Дегенмен полиция жүргізушіге рақымшылық қолданылатыны туралы нақты мәлімет берген жоқ.

Қазір Ульяна Лагашкина төсек тартып жатыр. Жаздың ортасына дейін отбасын асырап, маникюр жасап күн көрген әйел енді қашан аяққа тұратынын білмейді.

Ал оны көлікпен қаққан жүргізушінің ісі сотқа жете ме, әлде рақымшылықпен аяқтала ма, бұл сұрақ та әзірге жауапсыз.

Ульянаның бар тілегі біреу ғана: қайтадан өз аяғымен жүру.