Тоқаев елшілерді ауыстырды: кім тағайындалып, кім қызметінен босатылды?
Президент Қасым-Жомарт Тоқаев 13 қазанда дипломатиялық қызметке қатысты бірнеше жарлыққа қол қойды. Бірқатар елші тағайындалып, кейбірі қызметінен босатылды, деп хабарлайды Politico.kz.
Мемлекет басшысының жарлығымен Еркін Тұқымов Қазақстанның Пәкістандағы Төтенше және Өкілетті Елшісі болып тағайындалды. Ол бұрынғы қызметінен босатылды.
Еркін Валитханұлы Тұқымов 1973 жылы Өзбекстанның Термез қаласында дүниеге келген. Саяси ғылымдар кандидаты.
2018 жылдан 2022 жылға дейін Қазақстанның Қазандағы бас консулы болды. 2022 жылдан 2025 жылға дейін Президент жанындағы Қазақстанның стратегиялық зерттеулер институтын басқарды.
2025 жылдың маусымында Президенттің Ауғанстан бойынша арнайы өкілі болып тағайындалған.
Тоқаевтың тағы бір жарлығымен Сәулекүл Сайлауқызы Қазақстанның Мароккодағы елшісі қызметінен босатылды. Ол қоса атқарған Қазақстанның Тогодағы елшісі қызметінен де кетті.
Сәулекүл Сайлауқызы 1968 жылы Алматыда дүниеге келген. Бұған дейін Сыртқы істер министрлігінде түрлі қызмет атқарған, Қазақстанның Франция, Израиль, Бельгия және Вьетнамдағы елшіліктерінде жұмыс істеген.
2021 жылдың наурызында Мароккодағы елші болып тағайындалды. 2024 жылдың наурызынан бастап Тогодағы елші қызметін де қоса атқарды.
Бұдан бөлек, Қазақстанның бұрынғы сыртқы істер министрі Ермек Көшербаев та жаңа қызметке тағайындалды. Ол Қазақстанның Аустриядағы Төтенше және Өкілетті Елшісі әрі Вена қаласындағы халықаралық ұйымдар жанындағы Тұрақты өкілі болды.
Еске салайық, Ермек Көшербаев 2025 жылдың қыркүйегінен 2026 жылдың қыркүйегіне дейін Қазақстанның сыртқы істер министрі қызметін атқарған.
Соңғы жаңалықтар
