Тоқаев пен Бердімұхамедов телефон арқылы сөйлесіп, екі ел арасындағы серіктестікті кеңейтуге келісті

Қазақстан Президенті Қасым-Жомарт Тоқаев Түрікменстан Халк Маслахатының Төрағасы Гурбангулы Бердімұхамедовпен телефон арқылы сөйлесті, деп хабарлайды Politico.kz.

Сұхбат барысында Гурбангулы Бердімұхамедов мемлекет басшысын елде өткен алғашқы бірпалаталы Құрылтай сайлауының сәтті аяқталуымен құттықтап, бұл саяси оқиғаның Қазақстанның дамуы үшін тарихи маңызы зор екенін ерекше атап өтті. Өз кезегінде Қасым-Жомарт Тоқаев түрікмен халқының Ұлт көшбасшысына ыстық ықыласы мен ақ тілегі үшін ризашылығын білдіріп, сайлау барысын бақылауға белсене қатысқан Түрікменстаннан келген байқаушылардың еңбегін жоғары бағалады.

Тараптар екі ел арасындағы достық пен стратегиялық серіктестікке негізделген қарым-қатынастардың қазіргі қарқынына көңілдері толатынын жеткізді. Мемлекет көшбасшылары екіжақты байланыстарды одан әрі тереңдету мақсатында сауда-экономикалық, көлік-логистикалық, энергетикалық және мәдени-гуманитарлық салалар бойынша ынтымақтастықты кеңейтуге уағдаласты.

Атап айтқанда, екі мемлекет тауар айналымын арттырып, бірлескен жобаларды жүзеге асыруды, аймақтық транзиттік-көлік әлеуетін толық пайдалануды және энергетика саласындағы серіктестікті нығайтуды көздеп отыр. Сонымен бірге бауырлас екі халықтың рухани әрі мәдени қарым-қатынасын дамыту мәселелері де назардан тыс қалмай, тараптар тату көршілік байланыстарды одан әрі дамытуға өзара бейілді екендіктерін тағы бір мәрте растады.