Тоқаев шенеуніктерге халықтың мұң-мұқтажына құлақ асуды міндеттеді

Астанада өткен «Әкімшілік әділет және оның құқық үстемдігін қамтамасыз ету ісіндегі рөлі» атты халықаралық форумда Мемлекет басшысы Қасым-Жомарт Тоқаев билік пен халық арасындағы сенім мен келісімді нығайтудың маңыздылығын мәлімдеді, деп хабарлайды Politico.kz.

Жиын қонақтарына арнайы келгені үшін алғыс айтқан Президент форум барысында көтерілген өзекті мәселелер мен құнды пікірлерді Үкімет алдағы уақытта міндетті түрде назарда ұстайтынын жеткізді.

«Ең алдымен, баршаңызды алқалы жиынның ашылуымен құттықтаймын! Қадірлі меймандарға осы форумға арнайы келгендері үшін алғыс айтамын. Сіздерді Астана төрінде көргеніме ризамын. Жаңа ғана форум тақырыбы бойынша өзекті ойлар мен құнды пікірлер айтылды. Алдағы уақытта Үкімет бұл жұмысты міндетті түрде назарда ұстайды. Шын мәнінде, бүгінгі жиынның мән-маңызы айрықша. Мемлекет пен қоғам тұтастығын нығайту – Қазақстан үшін алдыңғы қатардағы міндеттің бірі. Еліміз тұрақты дамуы үшін халық пен билік арасында өзара сенім және келісім болуы керек. Бұл – мызғымас қағида», — деді Қасым-Жомарт Тоқаев.

Сонымен қатар ол мемлекеттік аппараттың жұмысына қатысты нақты талаптарды еске салды.

«Бірақ мұндай келісім өздігінен пайда болмайтыны анық. Қоғамдық келісім, бұл – көпқырлы табанды жұмыстың нәтижесі. Сондықтан мен Президент ретінде осы өте өзекті мәселеге баса мән беремін. Біз «Халық үніне құлақ асатын мемлекет» тұжырымдамасын жүзеге асыра бастадық. Ашық диалог жүргізу, азаматтардың мұң-мұқтажын ескеріп, арыз-шағымына дер кезінде жауап беру елдегі түбегейлі өзгерістердің өзегі саналады. Осы маңызды жұмысқа биліктің әр деңгейдегі өкілдері, соның ішінде министрлер, әкімдер, депутаттар белсенді түрде қатысуы керек. Бұл – мемлекеттік қызметшілердің конституциялық міндеті», — деді Мемлекет басшысы.

Осы ауқымды жиынмен қатар, бүгін Президент 2026 жылдың 15 наурызында қабылданған Конституция ережелерін іске асыруға бағытталған маңызды конституциялық заңдарға қол қойды.