Тоқаев үнемдеуді тапсырғанда шенеуніктер TANK пен Hyundai сатып алып жатыр

Мемлекет басшысы тиімсіз шығындарды қысқартып, қымбат көлік алуды тоқтатуды қатаң тапсырғанына қарамастан, мемлекеттік мекемелер құны ондаған миллион теңге тұратын темір тұлпарларға тапсырыс беріп жатыр, деп хабарлайды Politico.kz.

Редакциямыз мемлекеттік сатып алу порталынан бірден екі қымбат көлік алуға арналған өтінімді байқады. Оның бірі Мәдениет және ақпарат министрлігіне, ал екіншісі Қонаев қаласының әкімдігіне тиесілі болып шықты.

Мұражай басшылығына былғары салон қажет

Мәдениет министрлігіне қарайтын Ұлттық орталық мұражай басшылығы 22 сәуір күні жеңіл көлік алуға 14,1 млн теңге бөліп, сол күні-ақ сауданы аяқтап тастаған. Олар портал арқылы Hyundai Auto Almaty компаниясын тікелей шақырып, оны бірден жеңімпаз деп таныған. Техникалық сипаттамасына қарағанда шенеуніктер соңғы үлгідегі Hyundai Sonata көлігіне тапсырыс берген. Бұл ақшаға олар былғары салонды және орындықтары жылытылатын барлық қолайлы жағдайы бар көлікпен жүргісі келеді.

Қонаев шенеуніктері жол талғамайтын көлікке құмар

Ал Қонаев қаласының мемлекеттік активтер және сатып алу бөлімі министрліктегі әріптестерінен асып түсіп, өздеріне бағынысты ұйымға автокөлік алу үшін бірден 32,9 млн теңгеге өтінім жариялаған. Оларға толық жетекті және барлық электронды көмекшісі бар 7 орындық TANK 500 маркалы люкс жол талғамайтын көлігі керек болған. Бұл хабарландыру да порталға бүгін шыққандықтан әзірге оның жеңімпазы анықталған жоқ.

Үкімет халықтан шығындарды қысқартып, қаражатты үнемдеуді сұрап жатқанда шенеуніктердің мұндай қадамы қоғамда сұрақ тудырып отыр. Жоғары лауазымды тұлғалар Ұлттық қорға тәуелділікті азайтып, ақшаны тек маңызды бағыттарға жұмсау керек екенін айтқанымен, мемлекеттік қызметкерлердің басты мақсаты өздеріне жайлы көлік алу болып тұрғандай.

Бұл жағдай Астанада президент Тоқаевтың қатысуымен Орталық Азия елдерінің экологиялық саммиті өтіп жатқан кезде орын алғанын да айта кету керек.