Трамп Путинді келіссөзді әдейі созып отыр деп санайды
АҚШ президенті Дональд Трамп Ресей басшысы Владимир Путинге наразы екенін білдірді және санкцияларды күшейту мәселесін қарастырып жатыр, деп хабарлайды POLITICO.KZ.
Fox News-тің Ақ үйдегі аға тілшісі әрі подкаст жүргізушісі Джаки Хайнрих әлеуметтік желіде жариялаған ақпаратына сәйкес, Трамп Путиннің жан-жақты бітім жөніндегі келіссөздерді әдейі созып отырғанын айтқан. Ақ үй бұл жағдайға байланысты жаңа әрекет жоспарын талқылауда.
АҚШ билігі санкциялардың орындалуын бақылауды «10-нан 3 деңгейде» деп бейресми түрде бағалап отыр. Осыған байланысты Ресейдің заңсыз мұнай тасымалдаумен айналысатын «көлеңкелі флотына» қарсы нақты шаралар қарастырылуда.
Атап айтқанда, Балтық теңізі арқылы заңсыз мұнай тасымалдап жүрген ресейлік танкерлерді тоқтату ықтималдығы жоғары. FOX мәліметіне сәйкес, ресейлік «көлеңкелі флот» қазіргі уақытта санкция астында болса да, Ресейдің заңсыз мұнай экспортының 70%-ын жүзеге асырып отыр.
Ақ үйдегі ақпарат көзі Трамптың Путинге сенуден қалғанын атап өтті. Қазір Вашингтонда бұл мәселе бойынша қатаң әрекет жоспары әзірленіп жатыр.
Соңғы жаңалықтар
