Трамп жаңа сауда соғысын бастады, 180-нен астам елге кедендік тариф енгізді – ішінде Қазақстан да бар

АҚШ президенті Дональд Трамп Ақ үйде өткен баспасөз мәслихатында 180-нен астам елге, соның ішінде Қазақстанға қарсы жаңа кедендік тариф енгізілгенін жариялады, деп хабарлайды POLITICO.KZ.

Трамптың айтуынша, бұл қадам АҚШ экономикасын қалпына келтіру және саудадағы әділетсіздікті тоқтату үшін қажет болған. Жаңа кедендік баж салықтары кейбір елдер үшін 50%-ға дейін жетеді. Қазақстан үшін белгіленген тариф 27% мөлшерінде болды.

Трамп ұсынған кестеде посткеңестік елдер үшін келесі салық мөлшерлері көрсетілген:

• Молдова – 31%
• Қазақстан – 27%
• Армения, Әзірбайжан, Өзбекстан, Қырғызстан, Тәжікстан, Грузия, Түрікменстан – 10%

Айта кетейік, Ресей мен Беларусь бұл тізімде жоқ, ал кейінірек АҚШ Қаржы министрлігі бұл шешімге қатысты түсініктеме беретінін хабарлады.

Тариф тізіміне Қазақстанмен қатар басқа да ірі экономикалар енгізілген:

• Қытай – 34%,
• Еуроодақ – 20%,
• Үндістан – 26%,
• Вьетнам – 46%,
• Жапония – 24%,
• Корея – 25%,
• Бангладеш – 34%,
• Малайзия – 24%,
• Ұлыбритания – 10%,
• Оңтүстік Африка – 30%,
• Сербия – 37% және басқалар.

Кей елдер үшін ең жоғары тариф – 50% көлемінде белгіленді. Бұл Лесото және Францияның Сен-Пьер және Микелон секілді сыртқы аумақтарына қатысты.

Сонымен қатар Трамп барлық өзге елдер үшін ең төменгі 10% кедендік салықты енгізетінін айтып, бұл шешімді "АҚШ-тың экономикалық тәуелсіздігін қорғау және алаяқтықтан арылу жолы" деп түсіндірді.

«2 сәуір – Америка паразиттерден құтылған күн» деп мәлімдеген Трамп бұл қадамның мақсаты – "Американың ұлылығын қайта жаңғырту" екенін атап өтті.

Экономистердің пікірінше, бұл тарифтік саясат әлемдік экономикаға ғана емес, АҚШ-тың өзіне де теріс әсер етуі мүмкін.