Елордада жеңілдетілген несиемен пәтер алуға өтініш қабылданып жатыр

4 қыркүйектен бастап Астанада «Елорда жастары» жеңілдетілген несиелеу бағдарламасына қатысуға өтінімдерді қабылдау жүргізіліп жатыр. Ол 10 қыркүйекте сағат 23:59-ға дейін жалғасады. Бағдарламаға қатысу үшін онлайн өтініш беру жеткілікті, деп хабарлады елорда әкімдігі.

Бағдарламаға қатысу үшін онлайн өтініш беру жеткілікті.

Тіркеуді бастамас бұрын сізде NCAlayer орнатылғанына көз жеткізу керек. Бұл бағдарламаны https://pki.gov.kz сайтынан жүктей аласыз. Әрі қарай ЖСН, e-mail, телефон нөмірі және ЭЦҚ (RSA/GOST сертификаттары) сияқты қажетті деректерді толтыра отырып, birge.astana.kz порталында тіркелу қажет.

Осыдан кейін «тұрғын үй бағдарламалары» бөліміне өтіп, «Elorda zhastary қалалық жеңілдетілген несие бағдарламасы» қызметін таңдау керек. Әрі қарай өтініш формасын ашу үшін «Қосу+» түймесін басыңыз.

Нысанды толтырыңыз, қажетті құжаттарды тіркеңіз, ЭЦҚ (RSA/GOST сертификаттары) көмегімен өтінішке қол қойыңыз және оны жіберіңіз. Өтініш бергеннен кейін оны қарау нәтижесі бар KIT_NOTIFY немесе SmartAstana SMS-хабарламасын күту керек.

Еске сала кетсек, бағдарлама елордадағы бастапқы немесе қайталама нарықта «Отбасы банк» АҚ арқылы пәтерді мынадай тиімді шарттармен сатып алуға мүмкіндік береді:

• қарыздың ең жоғары сомасы – 18 млн теңге;
• бастапқы жарна – 10%;
• қарыз бойынша мөлшерлеме – жылдық 5%;
• несиелеу мерзімі – 19 жылға дейін.

Бағдарламаға Астана мекемелері мен ұйымдарының, соның ішінде медицина және педагог қызметкерлер, мәдениет, спорт, әлеуметтік қорғау саласындағы мамандар, ЖОО мен ҒЗИ, журналистер, коммуналдық кәсіпорын қызметкерлері, полиция, төтенше жағдайлар департаментінің, «Қазпошта» АҚ филиалдарының бейінді қызметкерлері, сондай-ақ 35 жасқа дейінгі бейінді қызметкерлер, «жетім, ата-анасының қамқорлығынсыз қалған балалар» санатында есепте тұрған балалар қатыса алады.

Бағдарлама туралы толығырақ Астана қаласының тұрғын үй және тұрғын үй инспекциясы басқармасының сайтынан мына сілтеме бойынша білуге болады.

Фото: Еркеғали Болатұлы