Су тасқыны: Қазақстанға гуманитарлық көмек керек пе
Сыртқы істер министрлігінің ресми өкілі Айбек Смадияров еліміздің өңірлеріндегі су тасқынынан кейін көрші мемлекеттен келген гуманитарлық көмекке қатысты түсінік берді.
«Қазіргі кезде Қазақстанның бірқатар өңірінде су тасқыны салдарынан қалыптасқан жағдайға байланысты бауырлас Қырғыз мемлекеті өз бастамасымен көмек жасады. Осыдан 2 күн бұрын Қырғыз Республикасының Төтенше жағдай министрлігі 15 жүк көлігі мен 1 жол талғамайтын көлігі Қазақстан шекарасын кесіп өтті. Онда 300 тонна жүк бар. Жүктің құрамында су, күріш, қарақұмық жармасы, кәмпит, шай, қант және тағы басқа азық-түлік жіберілді. Сондай-ақ жылытқыштар, керуенттер, шатырлар және тағы басқа да керек заттар тиелген», – деді А.Смадияров ведомстводағы апталық баспасөз мәслихатында.
Сонымен қатар ол көптеген бауырлас әрі достас елдерден телеграмма келіп жатқанын айтты.
«Олар өз қолдауын айтып, ниет білдіріп жатыр. Атап айтқанда, елімізде жедел штаб құрылды. Премьер-Министрдің барлық орынбасары тиісті өңірлерде жүр. Олар өңірлердегі жағдайды бақылауда ұстап отыр. Материалдық резервтің әлеуетін қолданып жатырмыз. «Қазақстан халқына» қоры мен халық та көмектесіп жатыр. Үкімет осы бағытта толыққанды жұмысты атқарып отыр», – деді ресми өкіл.
Бұл тұрғыда тілшілер «әзірге, елімізге сырттан көмек керек емес пе?» деп сұрады.
«Қазір өзіміз бәріне үлгеріп жатырмыз және тиісті көмек жасалып отыр. Бұл ретте, нақты регламент жоқ. Егер бір ел көмектесемін деп шешсе, онда жүкті бағыттай береді. Халықаралық тәжірибеге сәйкес, мемлекет өзі көмек сұраса, онда басқа елдер гуманитарлық көмекті жібереді», – деп нақтылады Айбек Смадияров.
Бұдан бұрын хабарланғандай, жақында Қырғызстанның Төтенше жағдайлар министрлігінің құтқарушылары су тасқынынан зардап шеккен Қазақстан халқына 300 тонна гуманитарлық жүк жіберді.
ПІКІР ЖАЗУ
