Түрмеде отырған әйел басқа тұтқыннан жүкті болып қалды

Тараздағы №67 мекемеде адам өлтіргені үшін сотталған 36 жастағы әйел басқа тұтқыннан жүкті болып қалды, деп хабарлайды Orda.kz.

Әйел Шығыс Қазақстан облысынан ауыстырылған, ал жүктілік мерзімі қазіргі таңда сегіз аптаға жетті.

Тұтқынның серіктесі — зорлау ісі бойынша 10 жылға сотталған ер адам. Оның жазасы осы желтоқсанда аяқталуы тиіс болатын.

Жүктілік фактісі №67 колонияның басшысы Бауыржан Сауранбаев қызметінен босатылғаннан кейін анықталды. Бауыржан Сауранбаев аттестациядан өте алмаған соң басқа мекемеге ауыстырылды.

Колонияда бақылауды қадағалаған жауапты қызметкер жұмыстан босатылып, режим бұзған басқа қызметкерлер де тәртіптік жазаға тартылды. Жағдайды түзету мақсатында мекеме басшылығына ауқымды қызметтік тексеріс жүргізілді.

Тараздағы №67 мекеме СИ-13 атауымен танымал, Жамбыл облысындағы ең қатаң тәртіптегі түрмелердің бірі болып саналады және 500 адамға арналған.

Редакция Жамбыл облысы бойынша Қылмыстық атқару жүйесі департаментіне сауал жолдады, бірақ ведомстводан ресми жауап әлі келген жоқ.