"Алғашқы үш күн күттім": Әнші Ғалымжан Сүлеймен Мұқасан Шахзадаевты кешірмейтінін мәлімдеді

“Нұр-Мұқасан” тобының жаңа әншісі Ғалымжан Сүлеймен өзін соққыға жыққан әріптесі Мұқасан Шахзадаевты кешірмейтінін мәлімдеді, деп хабарлайды POLITICO.KZ.

 Кеше оның мұрнына алғашқы ота жасалып, ісік басылған соң мұрынның қабырғасына тағы бір операция жасалатыны айтылды. Әншінің жағдайын білу үшін адвокаты Инга Иманбай мен Жан Ахмадиев ауруханаға барған. Ғалымжанның айтуынша, оқиғадан кейін Мұқасан Шахзадаев бірде-бір рет хабарласпаған.

“Өкінішке қарай, Мұқасан өзі кешірім сұрап хабарласқан жоқ. Тек оның атынан келушілер көбейіп кетті. Бірақ өзі бір ауыз шықпады. Бұл тәкаппарлықтың шегі деп ойлаймын. Енді келіп кешірім сұраса да, кешірмеймін. Алғашқы үш күнде күттім, одан кейін де күттім. Енді жоқ”, – деді ол.

Ғалымжан Сүлейменнің адвокаты Инга Иманбайдың сөзінше, іс ҚР Қылмыстық кодексінің 107-бабы бойынша қаралып жатыр.

“Адам денсаулығына қасақана орта дәрежеде зиян келтіруге 3 жылға дейін бас бостандығынан айыру жазасы қарастырылған. Бұл Қылмыстық кодекстің 107-бабы ‘Азаматқа қасақана жасалған қылмыс’ саналады. Адамдар тобының алдын ала сөз байласып, шақырып алып соққыға жығуы – әлімжеттік деп бағаланады. Бұл кісілер бір салада жүрген орындаушылар, Ғалымжан жасы кіші, ал Мұқасан үлкен. Біз қоғамдағы, әскердегі әлімжеттік туралы жиі айтамыз, ал халыққа үлгі болуы тиіс өнер адамдарының өздері бір-біріне әлімжеттік жасап жүр”, – деді адвокат.