АҚШ Зеленскийге минералдар бойынша жаңа келісім ұсынды

АҚШ пен Украина минералдар бойынша «жақсартылған» келісімді талқылауда

АҚШ пен Украина минералдық ресурстарды бірлесіп игеру туралы жаңа келісімнің егжей-тегжейін талқылауда, деп хабарлайды Axios.

Бұл бастамаға Украина президенті Владимир Зеленскийдің АҚШ президенті Дональд Трамптың бастапқы ұсынысын қабылдаудан бас тартуы себеп болған.

Axios агенттігінің мәліметінше, АҚШ Зеленскийге жаңа, «жақсартылған» келісім жобасын ұсынды. Украина мен Ақ үй арасындағы келіссөздер қарқынды жүріп жатыр, ал мәміле жасалуы әбден мүмкін.

«Соңғы жоба айтарлықтай жетілдірілді және ол украин заңнамасына сәйкес келеді», – дейді ақпарат көздері.

Минералдар келісімі және АҚШ-тың қысымы

Ақ үйдің ұлттық қауіпсіздік жөніндегі кеңесшісі Майк Уолтц бұл келісімнің маңыздылығын атап өтті:

«Бұл келіссөз. Украина бізбен бірге өз экономикасын дамытып, болашақта тұрақты серіктестік орнатқысы келеді. Біз оларға қауіпсіздіктің ең жақсы кепілдігін ұсынып отырмыз», – деді Уолтц Fox News арнасына берген сұхбатында.

Сарапшылардың пікірінше, Трамп әкімшілігі Украинаға қолдау көрсетуін осы келісімнің жасалуымен байланыстыруда.

«Біз Украинаға қолдау көрсетіп жатырмыз, бірақ неге бас тарту мен БАҚ-тағы сынды естуіміз керек? Украина келісімді қабылдауы керек», – деді Уолтц.

Келісімде қандай өзгерістер бар?

Америкалық және украиндық ақпарат көздерінің хабарлауынша, Вашингтон келісімдегі даулы тармақтарды алып тастаған.

Мысалы, Нью-Йорк соттарының юрисдикциясы туралы ереже келісімнен алынып тасталды.

Келіссөздер барысы

20 ақпанда Киевте Зеленский АҚШ президентінің арнайы өкілі Кит Келлогпен кездесті. Кездесуде минералдық ресурстарды игеру келісімі, соғыс жағдайы, әскери тұтқындарды қайтару және Украинаның қауіпсіздік кепілдіктері талқыланды.

Келіссөздерден кейін Зеленский АҚШ-қа алғыс білдіріп, екі ел арасында инвестициялық және қауіпсіздік жөнінде келісім жасасуға дайын екенін айтты.