Астана әкімдігі әжетханалар салу үшін 281 млн теңге жұмсамақ

Астана қаласы Есіл ауданы әкімінің аппараты душ, әжетхана кабиналары, темекі шегуге арналған орындар мен соған ұқсас құрылғыларды орнату үшін 281 миллион теңгеден астам қаражатқа тендер жариялаған, деп хабарлайды POLITICO.KZ.

Жоспарланған жалпы сома – 281 миллион теңгеден астам.

Лот №78668793-ОК3 бойынша стационарлық және модульді әжетханаларды күтіп ұстау мен қызмет көрсету қарастырылған. Қызмет көрсету үш кезеңге бөлінеді:

• 1-жыл – 56 964 285 теңге
• 2-жыл – 109 437 500 теңге
• 3-жыл – 114 909 821 теңге

Тендер 2025 жылдың 20 қазанында басталды. 23 қазанға дейін жалғасады. Қызмет көрсету мерзімі – 2027 жылдың 31 желтоқсанына дейін.

Әкімдік өкілдерінің айтуынша, Есіл ауданында күнделікті тазаланатын 16 әжетхана бар. Конкурс аясында дымқыл және құрғақ тазалау, унитаздарды, қол жуғыштарды, айна мен кондиционерлерді, гипсокартон қабырғаларды және вандализм салдарынан бүлінген басқа да бөліктерді ауыстыру мен жөндеу жұмыстары қарастырылған.

Қыста әжетханалар жылытылады. Қазіргі уақытта жылыту маусымына дайындық, соның ішінде жылыту жүйелерін тексеру мен электр қуатын есептеу жұмыстары жүргізілуде.