Астанада пәтерде қолдан жасалған ішімдіктер OLX арқылы сатылған (ВИДЕО)

Aстанада Saq жасағы OLX арқылы суррогат алкогольдің заңсыз сатылғанын анықтады, деп хабарлайды POLITICO.KZ.

Saq жасағы рейд өткізіп, OLX сайты арқылы қолдан жасалған суррогат алкоголь өнімін сатып жүрген азаматты анықтады. Ол заңсыз тауарды Абылайхан көшесі, 54 мекенжайындағы өз пәтерінен сатқан. Полиция шақырылғаннан кейін 3 литр суррогат алкоголь тәркіленді.

Бұл жағдай айналасында отбасылар тұратын, балалар ойнайтын қарапайым көпқабатты тұрғын үйде болған. Ал дәл сол жерде бір адам өмірге қауіпті өнімді кәдімгі тауар сияқты еркін саудалап отырған.

Көпшілік мұндай қауіпті заттардың дәл жанынан, күнделікті өмірдің ортасынан өтіп жатқанын байқамай қалады. Біреу суррогатты бейқам түрде «қауіпсіз өнім» секілді сатса, оның зиянын білмейтін адамдар қауіпке ұшырайды. Сондықтан мұндай фактілерді жасырмай, анықтап, әрекет талап ету — қауіпті өнімдердің таралуын тоқтатудың жалғыз жолы.