Ауғанстанда жойқын жер сілкінісі болып, 250 адам қаза тапты

Ауғанстанда болған қуатты жер сілкінісінен кемінде 250 адам қаза тауып, 500-ден астамы жарақат алды.

АҚШ Геологиялық қызметінің дерегіне сәйкес, магнитудасы 6,0 балдық жер сілкінісі жергілікті уақытпен дүйсенбіге қараған түні Пәкістан шекарасына жақын орналасқан Джалалабад қаласынан шамамен 20 шақырым қашықтықта тіркелген. Жер асты дүмпулері 8 км тереңдікте болған.

Ауғанстан Денсаулық сақтау министрлігінің өкілі Шарафат Заман:
«Біз ауқымды құтқару жұмыстарын бастап, жүздеген адамды зардап шеккен аймақтарға көмекке жұмылдырдық», – деп мәлімдеді.

Оның айтуынша, жер сілкінісі алыс таулы аймақта болғандықтан, нақты адам шығыны мен инфрақұрылымға келтірілген залалды анықтауға уақыт қажет.