Екі аяғынан айырылған студенттің ісі: Арыс әкімінің ұлы қатысқан апатқа қатысты іс қайта қаралады

Астана – Павлодар тасжолында 21 жастағы студент Талғаттың екі аяғынан айырылуына себеп болған жол апатына қатысты қылмыстық іс қайта жанданды, деп хабарлайды Politico.kz.

Бұған дейін іс рақымшылық туралы заң негізінде тоқтатылған еді. Енді бұл шешімнің күші жойылып, тергеу қайта жалғасады.

Жәбірленушінің әпкесі Гүлсім әлеуметтік желідегі парақшасында істің қайта қаралатынын хабарлады. Оның айтуынша, қылмыстық істі тоқтату туралы қаулының күші жойылып, өзі берген өтініштер мен шағымдардың барлығы қанағаттандырылған. Іс сотқа дейінгі тергеу кезеңіне қайтарылған.

«Ұзақ айларға созылған күрестен, көптеген өтініштер мен шағымдардан кейін бізді ақыры естіді. Қылмыстық істі рақымшылықпен тоқтату туралы заңсыз қаулының күші жойылды», – деп жазды ол.

Алайда Гүлсім бұл шешімді түпкілікті жеңіс деп санамайтынын атап өтті. Отбасы жол апатының барлық мән-жайын толық анықтап, кінәлілердің заң алдында жауап беруін талап етуді жалғастырмақ.

Жол апаты 2026 жылғы 29 мамырда Астана – Павлодар тасжолында болған. Автокөлік металл қоршауға соғылып, оның бір бөлігі көлік салонын тесіп өткен. Салдарынан 21 жастағы Талғат ауыр жарақат алып, дәрігерлер оның екі аяғын да ампутациялауға мәжбүр болған.

Оқиға кезінде көлікті Арыс қаласының әкімі ұлы Қайсар Манқараев басқарғаны хабарланған.

Осы жағдайдан кейін полиция Қазақстан Республикасы Қылмыстық кодексінің 345-бабы 2-бөлігі бойынша қылмыстық іс қозғаған. Аталған бап жол қозғалысы қағидаларын бұзып, абайсызда денсаулыққа ауыр зиян келтіруге қатысты.

Алайда 16 қыркүйекте тергеу рақымшылық туралы заң негізінде тоқтатылған. Бұл шешім жәбірленушінің отбасының наразылығын туғызып, жақындары істі қайта қарауды талап еткен.

Бұған дейін Гүлсім Талғаттың әлі де ем қабылдап жатқанын және оған қосымша медициналық процедуралар қажет екенін айтқан. Отбасы оның оңалуына байланысты шығындарға да алаңдаулы.

Енді қылмыстық істің қайта жандануы жол апатының мән-жайын толық анықтауға мүмкіндік беруі мүмкін. Жәбірленушінің отбасы тергеу жан-жақты жүргізіліп, оқиғаға құқықтық баға беріледі деп үміттенеді.