Елена Рыбакина Гиннесс рекордтар кітабына енді

Қазақстан атынан өнер көрсететін әлемнің 5-ші ракеткасы Елена Рыбакина тарихи жетістікке қол жеткізді. Ол бір теннис турнирінен алынған ең үлкен гонорар үшін Гиннесс рекордтар кітабына кірді, деп хабарлайды POLITICO.KZ.

Рыбакина 2025 жылы Эр-Риядта өткен WTA қорытынды турнирінде 5,235 миллион АҚШ долларын немесе шамамен 2,7 млрд теңге жеңіп алды. Бұл теннис тарихындағы, ерлер мен әйелдер арасындағы ең ірі жүлде қоры.

Бұған дейінгі рекорд 2025 жылғы АҚШ Ашық чемпионатында 5 миллион доллардан тапқан Арина Соболенко мен Карлос Алькарасқа тиесілі болған.

Елена Рыбакина Эр-Риядтағы байрақты додада бірде-бір рет ұтылмай, финалда әлемнің бірінші ракеткасы Арина Соболенконы тізе бүктіріп, чемпион атанды.

Айта кетейік, осы маңызды жеңістен кейін Қазақстан Президенті Қасым-Жомарт Тоқаевтың Жарлығымен Елена Рыбакина «Барыс» III дәрежелі орденімен марапатталған еді.