"Мәлімдеме қате болды": Депутат "Штрафстан" туралы сөзінен бас тартты

Мәжіліс депутаты Азат Перуашев бұған дейін Қазақстанды «Штрафстан» деп атаған мәлімдемесіне қатысты пікір білдірді, деп хабарлайды Politico.kz.

3 маусым күні Мәжіліс кулуарында журналистердің сұрағына жауап берген депутат өткен жылы айтқан сөзінің орынсыз болғанын мойындады.

«Өткен жылы осындай мәлімдеме жасаған кезде Қазақстанды "Штрафстан" деп атау дұрыс емес екенін түсіндім. Парламент депутаттары әр сөзін мұқият ойланып, салмақтап айтуы керек. Бұл сөзді бір жыл бұрын айттым. Кеше президент тек мені ғана емес, басқа да азаматтарды сынға алды. Бұл – жұмыс, бұл – өмір. Біз президенттің сынын қабылдап, одан сабақ алып, әрі қарай жұмыс істеуіміз керек», – деді Азат Перуашев.

Депутаттың айтуынша, қазір ол Қазақстанды мұндай атаумен сипаттауға болмайды деп есептейді.

«Біздің еліміз – Қазақстан. Бұл "Штрафстан" емес. Біз өркениетті мемлекетпіз», – деп түйіндеді мәжілісмен.

Еске салайық, бұған дейін Азат Перуашев Қазақстанда айыппұлдардың көптігін сынға алып, елді «Штрафстан» деп атаған болатын. Бұл мәлімдеме қоғамда қызу талқыланған еді.