Облыстық балалар ауруханасында медбикеден туберкулез анықталды

Ақтөбеде балалар ауруханасының 21 жастағы медбикесінен туберкулез анықталды, деп хабарлайды POLITICO.KZ.

21 жастағы қыз ауруханада шамамен бір жыл жұмыс істеді. Бұған дейін ол медициналық комиссиядан өтіп, медициналық мекемеде жұмыс істеуге рұқсат алды.

Медбике 2023 жылдың желтоқсанында балалар ауруханасының реанимация бөліміне жұмысқа қабылданған. Жұмысқа орналасу кезінде ол флюорография қорытындысы мен денсаулығында патология жоқ екенін дәлелдейтін құжаттар ұсынған.

2024 жылдың қыркүйегінде медбике ауырып, пневмония диагнозымен еңбекке жарамсыздық демалысына шыққан. Ем-дом нәтижесіз болып, 23 желтоқсанда КТ тексерісінен өтіп, туберкулез БК+ диагнозы қойылған. Ол дереу ауруханаға жатқызылды.

Медбикемен тығыз байланыста болған балалар ауруханасының 55 қызметкері толық тексеруден өтті. Сонымен қатар реанимация бөлімшесінде емделген балалар да тексерілуде.

"Балалар ауруханасы жыл сайын 14 мыңнан астам баланы қабылдайды. Науқастардың арасында вакцинацияланбағандар да көп болғандықтан, ауру жұқтыру қаупі жоғары," – деп түсіндірді аурухана өкілдері.

Санэпидемиологиялық бақылау департаментінің мәліметінше, барлығы 326 байланыста болған адам тексеріледі. Әзірге туберкулез анықталған жоқ.

Облыстық фтизиопульмонология орталығының бас дәрігері Ерлан Тәтімов:
"Тексеруден өту өте маңызды. Зарарлану ықтималдығы ең алдымен отбасы мүшелері арасында жоғары. Бірақ аурухана, кәсіпорын немесе сыныптағы жұқтыру ықтималдығы аз болса да, тексеру жүргізіледі," – деді.

Ақпарат diapazon.kz сайтынан алынған.