Өзбекстан президентінің отбасында мысық жоғалып, бүкіл Instagram болып іздесті

Өзбекстан президентінің отбасында мысық жоғалып, бүкіл Instagram болып іздесті, деп хабарлайды POLITICO.KZ 24.kg сайтына сілтеме жасап.

Ташкент. 13 қазан. Өзбекстан президенті Шавкат Мирзиёевтің отбасындағы жағымды жаңалық әлеуметтік желіні шулатты. Бірнеше күн бұрын жоғалып кеткен сүйікті мысықтары аман-есен үйіне оралды.

Бұл туралы мемлекет басшысының қызы Шахноза Мирзиёева өзінің Instagram парақшасында хабарлады. Бұған дейін ол Ташкенттің «Қорасу-1» ауданында үй жануарының жоғалғанын айтып, көпшіліктен көмек сұраған еді. Шахноза ханымның айтуынша, бұл мысық отбасымен ұзақ жылдар бойы бірге өмір сүрген және балалар үшін отбасының нағыз мүшесіндей болып кеткен.

Президент отбасының өтінішіне көптеген адам бейжай қарамай, іздеу туралы хабарландырумен бөлісіп, қолдау білдірген. Нәтижесінде мысық көп ұзамай табылды.

Шахноза Мирзиёева барша жанашыр жандарға зор алғысын білдірді.

«Сіздердің мейірімділіктеріңіз бен жанашырлықтарыңыздың арқасында сүйікті мысығымыз үйге оралды. Әрбір хабарлама, әрбір репост бекер болған жоқ», - деп жазды ол өзінің парақшасында.

Ол кейінірек табылған мысықтың суретін де жариялады.