Полиция департаменті басшысының ұлы ауыр жазаға кесілді

Полицей басшысының ұлы Нұржан Арыновқа 10 жыл түрме жазасы тағайындалды, деп хабарлайды POLITICO.KZ, ZHEST_KZ арнасына сілтеме жасап.

2024 жылдың мамыр айында Маңғыстау облысында алқабилер соты Арыновты айыптаудан босатқан болатын. Алайда бұл шешім айыптау тарапының шағымы негізінде апелляциялық сот арқылы қайта қаралды.

Арынов рюкзагында электронды таразы, полиэтилен пакеттер және 43 грамм тыйым салынған психотроптық заттармен ұсталған. Алқабилердің алғашқы шешімі бойынша ол сот залынан босатылды. Маусым айында апелляциялық сот алқабилердің шешімін жоққа шығарып, қайта қаралған іс бойынша Арыновқа 10 жыл жаза тағайындады.

Адвокаттар процессуалдық заң бұзушылықтарға сілтеме жасап, апелляциялық шағым түсіргенімен, сот бұл шағымды қанағаттандырмады. Осылайша, 2024 жылдың 25 желтоқсанында сот шешімі заңды күшіне енді.

Сонымен қатар, Қазақстан президенті Қасым-Жомарт Тоқаев қол қойған жаңа заңға сәйкес, есірткі заттарын «жасырын қоймалар» арқылы таратқаны үшін жазаны жеңілдету мүмкіндігі қарастырылған. Бұл заң Арыновтың ісіне де ықпал етуі мүмкін.