«Қазақстан мектептеріне қарулы шабуыл жасауға дайындық жүріп жатыр»: Жалған ақпаратқа қарсы іс-қимыл орталығы мәлімдеме жасады

Әлеуметтік желілерде «Қазақстан мектептеріне қарулы шабуыл жасауға дайындық жүргізіліп жатыр» деген сипаттағы хабарламаларды жариялап жүрген беймәлім тұлғалар атынан таратылатын анонимді каналдар тобының белсенділігі тіркелді, деп хабарлайды POLITICO.KZ Жалған ақпаратқа қарсы іс-қимыл орталығына сілтеме жасап.

ІІМ тарапынан аталған мәліметтер шындыққа сәйкес келмейтін ақпарат ретінде ресми түрде теріске шығарылды.

Аталған жалған хабар тарату фактісі бойынша сотқа дейінгі тергеп-тексеру басталды, барлық қажетті тергеу әрекеттері жүргізілуде.

Ұқсас мазмұндағы хабарламалар 2024 жылы Қазақстан аумағында да тіркеліп, мессенджер платформаларының әкімшілігі тарапынан шұғыл түрде жойылған болатын.

Жалған ақпаратқа қарсы іс-қимыл орталығының сараптамалық бағалауына сәйкес, жалған террористік ақпарат таратушылар халық арасында қорқыныш пен үрей туғызуға, мемлекеттік институттарға деген сенімді әлсіретуге, қоғам мен арнайы қызметтердің жалған қауіптерге қалай әрекет ететінін тексеруге тырысады. Бұл – кейінгі фейктер мен алып-қашпа әңгімелердің таралуына негіз қалыптастыру әрекеті.

«Азаматтарды сабыр сақтауға, тек ресми ақпаратқа сенуге және арандатуға ермеуге шақырамыз. Егер осы тектес күмәнді хабарламалар немесе жазбалар алсаңыз - дереу құқық қорғау органдарына немесе басқа да құзыретті мекемелерге хабарлауыңызды сұраймыз», - делінген Жалған ақпаратқа қарсы іс-қимыл орталығының хабарламасында.