Қазақстанда Ұлттық қор қаражатын бақылау комиссиясы қайта жұмысын бастады

Қазақстанда Ұлттық қор қаражатының жұмсалуын бақылау комиссиясы қайта жұмысын бастады, деп хабарлайды POLITICO.KZ.

Жоғары аудиторлық палата мәліметінше, комиссия алғаш рет 2014 жылы құрылып, бастапқыда Ұлттық банктің қарамағында болған. 2020 жылдан бастап оның жұмысы Жоғары аудиторлық палатаға жүктелген.

Ұзақ үзілістен кейін 21 ақпанда Жоғары аудиторлық палатада комиссияның жаңа форматтағы алғашқы отырысы өтті. Комиссия төрағасы, Қазақстан премьер-министрі Әлихан Смайылов мониторинг жүргізудің заңдылығы мен тиімділігін арттыру қажеттігін атап өтті.

«Біз комиссия жұмысын қайта жандандыруымыз керек. Ведомствоаралық үйлестіруді күшейтіп, Ұлттық қор қаражатының тиімді әрі мақсатты жұмсалуын қадағалауымыз қажет», – деді Смайылов.

Ол сонымен қатар қоғамның Ұлттық қор қаражатының қалай пайдаланылатынына ерекше мән беретінін атап өтті. Әсіресе, бұл «Ұлттық қор – балаларға» президенттік бағдарламасының іске қосылуымен тікелей байланысты.

«Ұлттық қордан бөлінетін қаражат экономикалық қайтарымдылықты қамтамасыз етуі керек. Бұл қаржы маңызы төмен жобаларға жұмсалмауы тиіс. Мемлекет басшысы осыны талап етіп отыр», – деді Жоғары аудиторлық палата басшысы.

Алдағы кезеңде комиссияның негізгі міндеттері:

• Ұлттық қордан бөлінген қаражаттың экономикаға тиімділігіне аудит жүргізу
• Қаржыны басым бағыттарға қайта бөлу немесе қажетсіз шығындарды қайтару жөнінде ұсыныстар әзірлеу

Айта кетейік, Ұлттық қор қаражатын бақылау комиссиясы – консультативтік-кеңесші орган болып табылады. Ол 2014 жылы Президент Жарлығымен құрылған.

Комиссияның қайта құрылуы мемлекет қаражатын тиімді және заңды пайдалану тетіктерін күшейтуге бағытталған.