Қысқартылған жұмыс аптасы енгізу мәселесі қарастырылып жатыр

Ресей болашақта төрт күндік жұмыс аптасына кезең-кезеңімен көшуі мүмкін, деп хабарлайды POLITICO.KZ.

Бұл туралы Ресей Мемлекеттік Думасының Еңбек комитетінің төрағасы, ЛДПР партиясының өкілі Ярослав Нилов РИА Новости агенттігіне мәлімдеген.

Оның айтуынша, төрт күндік жұмыс аптасына көшу бірден емес, біртіндеп жүзеге асады.

"Уақыт өте келе біз төрт күндік жұмыс аптасына өтеміз, бірақ бұл қатаң реттеу арқылы емес, табиғи түрде жүзеге асады", – деді депутат.

Ниловтың пікірінше, қашықтан жұмыс істеу, икемді жұмыс тәсілдерінің кеңінен енгізілуі және жаңа технологиялар мен шешімдердің дамуы адамдарға көбірек демалуға мүмкіндік береді. Ол болашақта жаңа жұмыс форматтары дәстүрлі жұмыс тәртібін өзгертуге ықпал ететініне сенімді.