Сенат Жоғарғы Соттың үш судьясын отставкаға жіберді

Сенат депутаттары үш судьяны отставкаға шығарды, деп хабарлайды POLITICO.KZ Kazinform-ға сілтеме жасап. 

Астана. 16 қазан. Сенат депутаттары Мемлекет басшысының ұсынысы негізінде Жоғарғы Соттың үш судьясын қызметінен босатты. Олардың барлығы өз еркімен отставкаға кетуге өтініш білдірген.

Депутаттар алдында Жоғары Сот Кеңесінің төрағасы Дмитрий Малахов сөз сөйледі. Ол отставкаға кетіп жатқан судьялардың сот жүйесіндегі еңбек өтілі 30 жылға жуық екенін және мінсіз беделге ие, әріптестері арасында жоғары абыройға ие екенін атап өтті.

«Сот төрелігі ісіне адалдығы мен сот жүйесін дамытуға қосқан зор үлесін ескере отырып, Ғабит Өмірханұлы, Роза Қайроллақызы және Тыныштық Әмірқызы лайықты демалысқа шығуға толық құқылы», – делінген Президент ұсынысында.

Сенат қаулысымен қызметінен босатылған судьялар:

• Ғабит Өмірханұлы Әлжанов (2023 жылғы 29 маусымда тағайындалған);
• Роза Қайроллақызы Жакудина (2015 жылғы 10 желтоқсанда тағайындалған);
• Тыныштық Әмірқызы Молдахметова (2015 жылғы 10 желтоқсанда тағайындалған).

Депутаттар Мемлекет басшысының ұсынысын бірауыздан қолдап, тиісті қаулы қабылдады.