Трамп Наурыз мерекесіне орай құттықтау сөзін жолдады

АҚШ президенті Дональд Трамп халықты Наурыз мейрамымен құттықтап, арнайы хабарлама жариялады, деп хабарлайды POLITICO.KZ.

Бұл туралы Ақ үйдің баспасөз қызметі мәлімдеді. Президенттің айтуынша, Наурыз – көктемнің келуін және жаңа жылдың басталуын білдіретін қуанышты мейрам.

«Әлемнің түкпір-түкпірінде, АҚШ-та және бүкіл әлемде ежелгі Наурыз мерекесін атап өтетін барша адамға ең жылы тілектерімді білдіремін.

Наурыз – парсы халқы үшін көктемнің басталуын және парсы жаңа жылын білдіретін қуанышты мереке. Бұл ежелгі дәстүр өткен жылдың жақсылығын еске алып, алдағы көктемге жаңартылған оптимизм рухымен дайындалуға мүмкіндік береді.

Парсы халқы өздерінің жарқын мәдениетімен және математика, табиғи ғылымдар, құқық, технология және өнер салаларындағы ерекше дарындылықтарымен қоғамның дамуына айтарлықтай үлес қосуда. АҚШ атынан сіздерді қуанышты мерекемен шын жүректен құттықтаймын.

Наурыз мерекесі құтты болсын!», – делінген Дональд Трамптың құттықтауында.

АҚШ президентінің Наурыз мерекесімен арнайы құттықтау жариялауы халықтар арасындағы мәдени диалог пен байланысты нығайтуға ықпал етеді.