Украина Ресейдің Олимпиадаға оралу жоспарына қарсы шықты

Украина үкіметі Ресейдің Олимпиада ойындарына оралуына қатысты айтылған ұсыныстарға қарсы шықты, деп хабарлайды POLITICO.KZ Politico басылымына сілтеме жасап.

Халықаралық Олимпиада комитетінің болашақ президенті Кирсти Ковентри Ресей спортшыларының қатысуына тыйым салуға қарсы екенін айтып, 2026 жылғы ойындарға олардың қайтып оралуына жол ашатын «дискуссияны» бастау қажет екенін мәлімдеген.

Бұл мәлімдеме Украинада наразылық тудырды. Киев Ресейдің Олимпиада және басқа да халықаралық спорттық жарыстардан толықтай шеттетілгенін қалайды.

Украина спорт министрінің орынбасары Юрий Музыка POLITICO тілшісіне:

«Біз халықаралық қауымдастықты Ресей мен Беларусь азаматтарын спортта қалыпты жағдайда көруге тырысқан кез келген әрекетке қарсы тұруға шақырамыз. Украинаға қарсы соғыс жалғасып жатқанда, мұндай қадамдар қабылданбауы керек», – деді.

Ол сондай-ақ былай деп мәлімдеді:

«Ресей Федерациясында спорт — мемлекеттік саясаттың бір бөлігі. Онда спорттың ешқандай автономиясы жоқ. Спортшылар мен шенеуніктер – үгіт-насихат құралының бір бөлігі».

Юрий Музыка Киевтің Ресей спортын халықаралық алаңнан шеттету жөніндегі ұстанымы өзгермейтінін, әрі бұл бағытта күресті жалғастыратынын айтты.

2022 жылы ақпанда Ресей Украинаға басып кіргеннен кейін ресейлік спортшыларға өз елінің туы мен әнұраны астында Олимпиадада өнер көрсетуге тыйым салынған болатын.