Зеленскийдің жақтастары тезірек сайлау өткізгісі келеді – бұл нені білдіреді?

Украинадағы бейбіт келіссөздер тоқырауға ұшырап, сайлау мерзімі көктемнен күзге ауысты, деп хабарлайды POLITICO.KZ РБК УКРАИНА агенттігіне сілтеме жасап.

Президенттік сайлауға қатысты қызу пікірталас жалғасуда. Украина парламентінің депутаттары мен саясаткерлері елдегі жағдайдың толықтай келіссөздердің нәтижесіне байланысты екенін айтып отыр. АҚШ президенті Дональд Трамптың «Украинадағы соғысты бірден тоқтатамын» деген уәдесі жүзеге аспаған соң, сайлауға дайындық мәселесі күрделене түсті.

Жуырдағы сауалнамалар бойынша, қазіргі президент Владимир Зеленскийдің рейтингі күрт өсіп, басты қарсыласы – бұрынғы Бас қолбасшы Валерий Залужныйдан басым түскен. Алайда, егер сайлау екінші турға өтсе, Залужныйдың жеңіске жету ықтималдығы жоғары болып отыр.

Зеленскийдің жақтастары қазір қолайлы сәтті пайдаланып, сайлауды тездетуді көздеп отырғаны белгілі болды. Дегенмен, билік тарапынан нақты дайындық жұмыстары әлі жүргізілмеген. Сонымен қатар, Валерий Залужныйдың сайлауға қатысу-қатыспауы әлі де белгісіз болып тұр.

Сайлауға дайындық барысында бірқатар мәселелер шешімін таппаған күйде қалып отыр. Әсіресе, елден кеткен миллиондаған украиналықтардың дауыс беру мәселесі басты назарда. Бұл мәселені шешудің нақты механизмі әзірге табылмаған.

Сонымен қатар, Украинаның оппозициялық партиялары да алдағы сайлауға дайындық жұмыстарын бастап кеткен. Петр Порошенко жетекшілік ететін «Еуропалық ынтымақтастық» партиясы қазіргі биліктің АҚШ-пен жүргізіп отырған келіссөздерін сынға алуда. Юлия Тимошенко басқаратын «Батькивщина» партиясы билікпен жақындаса бастағаны байқалады.

Ал Дмитрий Разумков пен Киев мэрі Виталий Кличко жетекшілік ететін партиялар әзірге өз позицияларын нақты жарияламады. Бұрынғы оппозициялық «ОПЗЖ» партиясының мүшелері де сайлауға қатысудың жолдарын іздеуде.

Дегенмен, Украинадағы президенттік және парламенттік сайлаудың нақты өтетін уақыты мен шарттары әлі де белгісіз болып қалып отыр. Қазіргі басты сұрақ – бейбіт келісімге келу мен атысты тоқтату мәселелері.