Жаңа адамдар Асан Үмбетовтің басшылық қызметке тағайындалуы туралы айтты

«Жаңа адамдар» қозғалысы Асан Үмбетовтің тағайындалуы туралы пікір білдірді, деп хабарлайды POLITICO.KZ.

Астана. 17 қазан. «Жаңа адамдар» қоғамдық қозғалысы Асан Үмбетовтің «ҚТЖ-Жүк тасымалы» компаниясындағы басшылық қызметке тағайындалуына қатысты пікір білдірді. Қозғалыс көшбасшысы Әсел Бәденова мұны қоғамдық пікірдің билікке ықпалының артқанын көрсететін маңызды оқиға деп атады.

Бұл пікірді Әсел Бәденова 15-16 қазан күндері өткен Қазақстанның XII Азаматтық форумында сөйлеген сөзінде айтты.

«Бүгінде қоғамның елде болып жатқан үдерістерге ықпалы айқын байқалады. Қоғамдық пікірмен санаспау қиын — дәл осы пікір қоғамдық күн тәртібін қалыптастырып, реттейді. Әлеуметтік желілердегі пікірлер мінберден айтылған мәлімдемелерден де қаттырақ естіледі.

Асан Умбетовтің резонансты бейнежазба мен қазақстандықтардың әлеуметтік желілердегі кең қолдауынан соң «ҚТЖ»-дағы маңызды лауазымға тағайындалуы — еңбек адамдарының бүгінгі таңда қоғам назарында екенін айқын көрсетеді. Оларды қорғайды, қолдайды және үлгі етеді.

Өз ісіне деген сүйіспеншілік, отансүйгіштік және бейжай қарамау — жаңа форматтағы көшбасшыларды қалыптастырудың шешуші факторлары мен үрдістеріне айналуда. Олар өз еңбегімен, ұстанымымен және шынайылығымен қоғам сеніміне ие болып отыр», - деді «Жаңа адамдар» қозғалысының көшбасшысы.