«Жоғары мәдениетіңізді айрықша атап өткім келеді»: Тоқаев Рыбакинаны құттықтады
Мемлекет басшысы теннисші Елена Рыбакинаны «Әлемнің бірінші ракеткасы» атағына ие болуымен құттықтады, деп хабарлайды Politico.kz.
«Сіз айрықша талант пен тынымсыз еңбектің және өзіңізге деген нық сенімнің арқасында WTA рейтингінде көш бастап, биік шыңды бағындырдыңыз. Осынау тарихи жеңісіңіз қазақ спортының даңқын асырды. Есіміңіз әлемдік теннис жылнамасынан ойып тұрып орын алды. Сіздің жетістікке толы жолыңыз – еліміздің жас спортшылары мен дүниенің түкпір-түкпіріндегі миллиондаған теннис жанкүйері үшін үлгі-өнеге. Сонымен қатар кортта да, қоғамдық орындарда да, жұртшылықпен қарым-қатынас барысында да байқалатын жоғары мәдениетіңізді айрықша атап өткім келеді. Бұл – сөзсіз Сіздің парасатыңыз бен адами қалпыңыздың айқын көрінісі», – деп жазылған құттықтауда.
Қасым-Жомарт Тоқаев Елена Рыбакинаның чемпиондарға тән жалынды рухтан қуат алып, жаңа белестерге батыл қадам баса беруіне тілектестік білдірді.
Айта кетейік, теннистен АҚШ-та өтіп жатқан US Open «Үлкен Дулыға» турнирінде Елена Рыбакина ширек финалда Париж Олимпиадасының чемпионы Жен Цинвэньді (Қытай) 3:6, 6:1, 6:4 есебімен жеңіп кетті.
Осы жеңістің арқасында теннисшісіміз жартылай финалға шығып қана қоймай, әлемдік рейтингте бірінші орынға көтерілді.
Соңғы жаңалықтар
