Жұлдыз Сүлейменова Оқу-ағарту министрі лауазымына қайта тағайындалды

Жұлдыз Сүлейменова Қазақстанның Оқу-ағарту министрі лауазымына қайта тағайындалып, өз орнын сақтап қалды. Мемлекет басшысы 3 қыркүйекте тиісті Жарлыққа қол қойғанын Ақорданың баспасөз қызметі хабарлады.

«Мемлекет басшысының Жарлығымен Жұлдыз Досбергенқызы Сүлейменова Қазақстан Республикасының Оқу-ағарту министрі лауазымына тағайындалды», – делінген ресми құжатта.

Кадрлық шешім шықпас бұрын оның кандидатурасын Құрылтай қарады. Әлеуметтік-мәдени даму комитетінің отырысында депутаттар Сүлейменованың кандидатурасын талқылап, оны осы қызметке бекітуге келісім берді.

Бұл рәсім «Қазақстан Республикасының Құрылтайы және оның депутаттарының мәртебесі туралы» Конституциялық заңның 30-бабына сәйкес өтті. Жұлдыз Сүлейменова аталған министрлікті 2025 жылдың 29 қыркүйегінен бері басқарып келеді.

Жұлдыз Сүлейменова кім?

Жұлдыз Досбергенқызы 1983 жылы Ақтөбе облысында дүниеге келген. Әл-Фараби атындағы Қазақ ұлттық университетінде «Тарих» мамандығы бойынша бакалавриатты, сондай-ақ философия және саясаттану бағытында магистратура мен PhD докторантураны бітірген.

Еңбек жолын 2000 жылы ҚазҰУ-дың студенттік өзін-өзі басқару ұйымының төрағасы болып бастаған. Кейін Алматы экономика және статистика академиясының Ақтөбе институтында оқытушы, «Нұр Отан» партиясының облыстық филиалында консультант және «Жас Отан» Жастар қанатында жауапты қызметтер атқарды.

2007–2008 жылдары Алматыдағы Ы. Алтынсарин атындағы №159 гимназияда тарих пен құқық пәндерінен сабақ берді. Одан кейін Қазақ ұлттық аграрлық университетінде, Халықаралық бизнес академиясында және Қазақ мемлекеттік қыздар педагогикалық университетінде түрлі басшылық деңгейдегі лауазымдарда жұмыс істеді.

2012 жылдан бастап білім беру саласындағы ірі жүйелерде қызмет етті. Ол «Назарбаев Зияткерлік мектептері» дербес білім беру ұйымында департамент директоры, кейін Алматыдағы физика-математика бағытындағы Зияткерлік мектептің басшысы болды.

2021–2025 жылдары Мәжілістің VІІ және VІІІ шақырылымдарының депутаты болды. Онда Әлеуметтік-мәдени даму комитетінің мүшесі, «AMANAT» партиясы фракциясы жетекшісінің орынбасары, сондай-ақ Ұлттық құрылтай мен Президент жанындағы Әйелдер істері және отбасылық-демографиялық саясат жөніндегі ұлттық комиссияның құрамында қызмет атқарды.