Алаяқтар мемлекеттік қызметкерлерге арналған Aitu қосымшасын сылтауратып елді алдауға кірісті

ҚР мемлекеттік қызметкерлері BTS Digital компаниясының Aitu ұлттық мессенджеріне жаппай ауысып жатқанда алаяқтар өз ісіне кірісіп кетті, деп хабарлайды POLITICO.KZ. 

Aitu ұлттық мессенджерін Цифрлық даму, инновациялар және аэроғарыш өнеркәсібі министрі Жаслан Мәдиев «қауіпсіз қосымша» деп баға берген еді. Алайда әлеуметтік желіде интернет-алаяқтардың адамдарға Aitu қосымшасына қосу үшін хабарласып, код сұраған видеосы тарады. Видеода оператор «Бұл маған емес, сізге қажет» деп кодты айтуын талап етеді. Сонымен қатар қазақстандыққа хабарлама «Aitu_Pass» деген атаумен келген. 

Айта кетейік, Жаслан Мәдиев 2025 жылғы 27 тамызда мемлекеттік аппарат жұмысын Aitu отандық мессенджеріне ауыстыру перспективалары туралы айтқан болатын. Ол Aitu мессенджері акционерлерінің бірі «Қазақтелеком» АҚ екенін атап өтті.

«Бұл жерде кімге тиесілі деген мәселе көтерілмеуі керек. Ұлттық мүдделерді сақтау және ілгерілету, ақпараттық қауіпсіздік мәселесі туралы сөз қозғалуы тиіс», деген еді министр. 

Жаслан Мәдиев мемлекеттік қызметкерлердің қандай да бір құжаттарды, қызметтік ақпаратты жіберу, қызметтік мәселелерді талқылау кезінде ұлттық мессенджерді пайдалануын қамтамасыз етіп жатқанын мәлімдеген.