Алматыда 13 тоннадан астам кокаин тәркіленді

Ұлттық қауіпсіздік комитеті есірткі контрабандасының халықаралық арнасын жою бойынша арнайы операция жүргізді. Операция нәтижесінде Алматы қаласында Қазақстан тарихындағы ең ірі кокаин партиясы тәркіленді.

ҰҚК баспасөз қызметінің хабарлауынша, кешенді іс-шаралар барысында жалпы салмағы 13 тонна 183 килограмм болатын есірткі заты алынған.

Анықталғандай, ірі есірткі партиясы Қазақстан аумағы арқылы үшінші елдерге транзитпен жөнелтілмек болған.

Есірткі арнасын ұйымдастырды деген күдікпен екі шетелдік азамат ұсталып, қамауға алынды.

Қазіргі уақытта осы дерек бойынша Қылмыстық кодекстің 297-бабының 3-бөлігімен сотқа дейінгі тергеп-тексеру амалдары жүргізіліп жатыр. Ұлттық қауіпсіздік комитеті Қылмыстық-процестік кодекстің 201-бабына сәйкес, тергеу мүддесіне орай өзге ақпараттың жария етілмейтінін хабарлады.

Сурет: ҰҚК