Ақмола облысында көлік үш жол жұмысшысын қағып, біреуі оқиға орнында қаза тапты

25 қазан 2026, 10:07 79

Ақмола облысында жеңіл автокөлік жол жөндеу жұмыстарына қатысып жүрген үш жұмысшыны қағып кетті, деп хабарлайды Politico.kz.

Салдарынан бір адам оқиға орнында қаза тауып, тағы екі адам ауруханаға жеткізілді.

Жол-көлік оқиғасы 23 қазанда Астана – Атбасар – Жақсы тасжолының 163-шақырымында болған.

Полицияның мәліметінше, Chery Arrizo 8 автокөлігінің жүргізушісі жолдың жүріс бөлігінде тұрған жол ұйымының үш қызметкерін қағып кеткен.

Ведомство өкілдері оқиға кезінде жұмысшылардың үстінде жарық шағылыстыратын арнайы кеудешелер болмағанын атап өтті.

«Жол-көлік оқиғасы салдарынан бір жаяу жүргінші оқиға орнында көз жұмды, тағы екеуі медициналық мекемеге жеткізілді», – деп хабарлады полиция.

Аталған дерек бойынша сотқа дейінгі тергеу басталды. Құқық қорғау органдары апаттың барлық мән-жайын анықтап жатыр.

адам қағып кету Ақмола облысы жол көлік оқиғасы Жұмысшы өлімі Полиция департаменті

Бізді Google-дың негізгі дереккөздер тізіміне қосыңыз